2019 – eitt gott ár hjá føroysku byggivinnuni
14. feb. 2020
Tað er vanliga góð tekin um gongdina, tá feløg eru skjót at kunngerða sínar ársroknskapir.

P/F Borg, ið er næst størsti føroyski veitari av tilfari til byggivinnuna, hevur júst kunngjørt sín roknskap fyri farna ár.

 

Roknskapurin 2019 vísir stóra framgongd í bruttoavlopi, men eisini stóra øking í lønarútreiðslum.   

Hetta kemst av, at felagið um ársskiftið 18/19 yvirtók raksturin hjá Havnar Timburhandil, og hetta ávirkar tí roknskapin í 2019 í stóran mun. 

 

P/F Borg økti í fjør bruttoavlopið  við 7 mió kr í mun til undanfarna ár, meðan lønarútreiðslurnar øktust við sløkum 9  mió kr.  

 

Umframt at reka timburhandil, hevur felagið eisini virksemi innan partabrøv og annað starv í hesum sambandi.

 

Fíggjarligu inntøkurnar vóru góðar 7 mió kr í fjør í mun til 0,7 mió kr árið fyri.

 

Úrslitið áðrenn skatt gjørdist eitt avlop á 8,7 mió  móti 10 mió kr árið fyri.  Eginpeningurin við árslok 2019 var góðar 38 mió kr.

 

Starvsfólkatalið hjá P/F Borg øktist úr 42 í 2018 til 64 í  meðal 2019.

 

Stjóri og høvuðseigari í P/F Borg er Rodmundur Nielsen.
 
 
P/F BORG
Øll tøl eru í 1.000 kr.   2019 2018 2017 2016 2015
Rakstur
Bruttovinningur 39574 32621 28915 25374 19789