Ódnarstormur hevur rakt AI-risar í USA. Mist virðir uppá 800 mia dollarar eftir eini viku

Hátøknifeløg í USA eru rakt av risastórum kursfalli seinastu vikuna.

Sannur ódnarstormur hevur rakt hátøknifeløgini í USA.

Sambært Financial Times hava átta av stórstu feløgunum innan artificial intelligence  (AI) í USA, herundir Nvidia, Meta, Palantir og Oracle samanlagt mist umleið 800 mia dollarar, svarandi til  slakar 5.200 mia kr.

Hetta hevur samstundis drigið tøkniliga indexið, Nasdaq, niður við 3% sum tað lægsta síðan apríl mánaða, tá Trump kunngjørdi nýggjar tollsatsir.

Finacial Times peikar á, at óttin stavar frá óvissuni um stóru íløgurnar í AI kunnu bera seg í longdini. Fleiri av stóru feløgunum hava gjørt sera stóra íløgur innan hesa vinnugrein og meginparturin er lánifíggjaður.

– Hetta minnir ikki sørt um KT-bløruna um aldarskiftið, sigur Floria Lelpo, íløgustjóri hjá Lombard Odier Investment Managers við Financial Times.