Nýggj vinnugreining:  Danska vinnan er sum heild væl fyri

Talið á húsagangum í donsku vinnuni hevur ikki verið lægri í fimm ár. Hinvegin blómar hugurin at seta nýggjar fyritøkur á stovn.

Uppgerðir hjá danska greiningarfelagnum Experian vísa, at talið á húsagangum er í støðugari minking og er fallið við sløkum 4% tað seinasta árið. Og tá hugurin at stovna nýggjar fyritøkur samstundis er vaksandi ásannar greiningarfelagið, at danska vinnan stendur á tryggari grund.

Uppgerðin hjá Experian vísir eisini, at umleið 17 % av donskum fyritøkum eru hart trýstar fíggjarliga og hava kós móti húsagangi, tó at tað ikki er vist, at húsagangurin verður veruleiki. Hóast talið kann tykjast høgt er hetta heldur lægri enn undanfarin ár.