Sølan hjá Tesla í Evropa í fríum falli

Í januar mánaða er sølan av nýggjum Tesla bilum fallin ógvusliga Í Evropa.  Stórsta afturgongdin er í Fraklandi, har sølutalið av nýggjum Tesla bilum er fallið við 63%.

Elon Musk, eigari og stjóri í Tesla kann nú staðfesta, at sølan av Tesla bilum í Evropa ikki fekk bestu byrjanina í januar mánaða 2025, samanborið við sama mánaða í fjør.

Í Fraklandi, sum er næst stórsti elbilamarkanaðurin í Evropa, vóru seldir 1141 nýggir Tesla bilar í januar mánaða, svarandi til eina afturgongd uppá 63 % í mun til undanfarna ár.

Stórsti marknaðurin fyri elbilar í Evropa er Týskland og har er gongdin tann sama. Skrásettir vóru 1277 nýggir Tesla bilar í januar mánaða, svarandi til eina afturgongd uppá 59%. Hetta hendi samstundis sum sølan av elbilum í Týsklandi øktist við 54%.

Neiliga gongdin av søluni av nýggjum Tesla bilum sæst eisini í Stórabretlandi og serliga í Norðurlondum, har sølan er fallin við meira enn 40%.

Kelda: Bloomberg