Hægsta tal av húsagangum í Danmark í 13 ár

Donsku húsagangirnir eru nú á sama støði sum í seinastu fíggjarkreppu. Bankarnir vænta tó ikki nærum so stór tap hesaferð í mun til seinastu fíggjarkreppu.

Tá søguliga stóra talið á donskum fyritøkum fóru á húsagang í kjalarvørrinum av altjóða fíggjarkreppuni í 2008-2009 sendi hetta eina milliardarokning til donsku peningastovnarnar.

Hóast talið á húsagangum nú fyri fyrstu ferð aftur er komið upp á sama støði sum í 2010 fær hetta ikki donsku bankarnar at blása í ávarðingarlúrarnar.

Bara í marts mánaða máttu 289 danskar fyritøkur snara lykilin, meðan talið fyri seinasta ársfjórðingin var 837. Hetta er hægsta talið í danska Hagstovan hevur skrásett seinastu 13 árini.

Undir seinastu bankakreppu máttu donsku bankarnir niðurskriva síni útlán við 36 mia kr, svarandi til 1,4 % av sínum útlánum.

Hesaferð vænta donsku bankarnir tó at sleppa munandi bíligari út úr húsagangunum hjá donskum fyritøkum.  Avgerandi frágreiðingin til hetta er tann at fyritøkurnar ið nú snara lykilin, hava munandi lægri lán í bankanum enn tær høvdu undir seinastu fíggjarkreppu.

Verður kagað eitt nú í ársfrásøgnina hjá Danske Bank sæst, at bankin væntar eina avskriving niðanfyri 0,18 % uppá síni útlán fyri inniverandi ár.