JT Electric: Besta úrslitið í søgu felagsins

11. mar. 2015
Høvuðsframleiðsla felagsins er ymisk hátøknilig útgerð til ali- og fiskivinnuna um allan heim.
 
At virksemið hjá JT Electric er økt munandi í fjør sæst m.a. av at bruttovinningurin er tvífaldaður, úr sløkum 5,3 mió kr í 2013 til slakar 10,9 mió kr í 2014. Starvsfólkaútreiðslurnar eru í sama tíðarbili øktar úr 5,6 mió kr til 7,4 mió kr.
 
Ársúrslitið eftir skatt gjørdist góðar 2,5 mió kr, móti einum halli árið fyri á 0,5 mió kr, ella ein framgongd á umleið 3 mió kr.
 
Í leiðslufrágreiðingini verður sagt, at góða gongdin í 2014 kemst av, at sølan av egnari framleiðslu uttanlanda er økt munandi. Hetta er galdandi fyri allar vørur, bæði til ali- og fiskivinnuna.
 
Felagið merkir týðiliga øktan eftirspurning  á nýggjum marknaðum uttanlanda,  eitt nú í Ruslandi, Íslandi og Tamania og er hetta ein beinleiðis avleiðing av, at føroyska alivinnan stendur seg so væl í altjóða høpi, sigur felagið í leiðslufrágreiðingini.
 
Í stuttari viðmerking til góða úrslitið 2014 sigur Rói Kalsø, stjóri í JT Electric, at felagið hevur verið virkið og miðvíst í síni marknaðarføring uttanlanda, umframt at felagið hevur megnað at hildið kostnaðarstøði niðri har prísirnir eru kappingarførir.  Og ikki minst, at fyrtøkan heldur fast við sínar sertænastur og áhaldandi mennir nýggjar vørur og tænastur.
 
Umleið 22 fólk starvast hjá JT Electric á Kambsdali.
 
Eginogn felagsins var við árslok 2014 var góðar 7,3 mió kr.
 
Sí vinnuskránna (nevnd, leiðsla vm.) og vinnuvideo hjá JT Electric her 
 

Aðrar greinar