Klaksvíkar Sleipistøð: Ein vinnulig sólsskinssøga
12. jun. 2015Tað skuldi vísa seg at verða eitt gott hugskot hjá Frimodt Rasmussen, maskinmeistara saman við øðrum at yvirtaka gomlu sleipistøðina í Klaksvík. Virksemið er síðan yvirtøkuna í 2011 fleirfaldað og hetta hevur skapt hópin av nýggjum arbeiðsplássum í fyritøkuni.
P/F Klaksvíkar sleipistøð, sum í dag er best kend sum KSS, er umframt sleipistøð ein smiðjudepil, har alt vanligt smiðju- og viðlíkahaldsarbeiði verður gjørt fyri bæði skip og virkir alt samdøgrið. KSS er eisini heildarveitari til viðlíkahalds- og umbyggingararbeiði, har fyritøkan saman við undirveitarum tekur sær av øllum viðurskiftum, sum hava við projektið at gera.
Bruttoúrtøkan hjá P/F Klaksvíkar Sleipistøð var í fjør slakar 24 mió kr móti umleið 5 mió kr í 2010, ið var seinasta árið hjá gomlu eigarunum. Útgoldnar lønir vóru í 2010 umleið 5 mió kr, meðan tær í fjør lógu millum 16 og 17 mió kr. Tað svarar til umleið 50 ársverk.
Avlopið áðrenn skatt í fjør var góðar 6 mió kr, móti einum lítlum halli í 2010, tá felagið var yvirtikið av nýggjum eigarum.
At eginognin seinastu 5 árini er hækkað úr 5 mió kr í 2010 til góðar 12 mió kr í 2014 og at rentingin av eginpeninginum liggur omanfyri 50% lýsir sera væl, hvussu góð henda íløgan hevur verið fyri nýggju eigararnar.
Roknskapurin hjá P/F Klaksvíkar Sleipistøð lýsir eina vinnuliga sólskinssøga av teimum heilt góðu, takkað veri eini framfýsnari og dugnaligari leiðslu og ikki minst – góðum starvsfólkum.
Sí vinnuskránna við vinnuvideo, vm. hjá P/F Klaksvíkar Sleipistøð her
