P/F Borg: Brattastu brotasjógvarnir lagt seg

19. feb. 2013
P/F Borg er tíðliga úti við sínum ársroknskapi fyri 2012 og boðskapurin kann tykjast eyðsýndur.
 
Stóri timburhandilin í Eysturoynni, við deildum á Skálafjørðinum og í Klaksvík hevur megnað at venda skútuni og kann framleggja ein roknskap fyri 2012 við  snøggum avlopi á 1,2 mió kr áðrenn skatt , móti einum halli á 256.000 kr árið fyri. Tað svarar til eina framgongd í úrsliti á slakar 1,5 mió kr. eftir einum ári.
 
Verður hugt nærri at roknskapinum sæst, at bruttovinningurin økist við hálvari mió kr, meðan starvsfólkaútreiðslur standa í stað.
 
Størsta broytingin í roknskapinum fyri farna árið er, at fíggjarútreiðslurnar eru lækkaðar heilt munandi.
 
Orsøkin góða úrslitið hjá P/F Borg í fjør er sostatt ikki bara vaksandi inntøkur, men í stóran mun eisini, at fyritøkan hevur megnað at lækka sínar fíggjarútreiðslur við einari mió kr  í mun til 2011.
 
Eginognin við ársenda 2012 var 8,3 mió kr, svarandi til eina helvt í mun til 2008, tá hon var 16,8 mió kr.
 
Sambært roknskapinum starvast 36 fólk hjá P/F Borg. Leiðslan er mannað við Rodmundi Nielsen, stjóra og Lars Peter Nielsen, sum nevndarformanni.
 
Sí vinnuskránna hjá P/F Borg her

Aðrar greinar