P/F Faroe Ship: Samstarv gevur úrslit
18. jun. 2013Úrslitið hjá P/F Faroe Ship gjørdist eitt avlop á slakar 50 mió áðrenn skatt í fjør. Úrslitið er ávirkað av, at felagið hevði eina framgongd í rakstrinum, men fekk minni útlutað í vinningsbýti enn árið fyri. Í 2012 fekk felagið góðar 10 mió kr í vinningsbýti, móti sløkum 30 mió í 2011.
Úrslitið av vanliga rakstrinum áðrenn fíggjarpostar, tvs vinningsbýti og aðrar fíggjarinntøkur, var 40,7 mió kr. Hetta er ein framgongd á 12 mió kr í mun til árið frammandunan.
Seinastu 3 árini hevur P/F Faroe Ship havt tilsamans slakar 220 mió kr í avlopi. Orsøkin til góðu úrslitini er, at felagið er partur av eini størri eind (Einskipafelag Islands Ehf. red) og hetta gevur felagum fleiri rakstrarfyrimunir.
Herumframt eru gjørdar tillagingar í rakstrinum, ið fevna um broytingar í siglingarkervinum og niðurlagan av virksemi, ið ikki bar seg, verður m.a. sagt í leiðslufrágreiðingini.
Eginognin hjá P/ Faroe Ship var við árslok 125 mió kr.
Meðalstarvsfólkatalið í fjør var 108.
Sí vinnuskránna hjá P/F Faroe Ship her
