P/F Varðin Pelagic: 6 mió. í avlopi í 5 mánaðir

 

Felagið tekur ímóti rávøru frá føroysku pelagisku fiskiskipunum, sum fáa kvotu útlutaða. Sostatt verður felagið ávirkað, um kvoturnar broytast.

 

Bruttovinningurin í fjør var góðar 44 mió kr, meðan útreiðslur til starvsfólk vóru góðar 28 mió kr hetta fyrsta roknskaparárið, tá virkið framleiddi í 5 mánaðir.

 

Sagt verður í leiðslufrágreiðingini, at stórur partur av søluni er í fremmandum gjaldoyra og felagið verður tí ávirkað nakað av broytingum í gjaldoyravirðum.

 

Felagið arbeiðir áhaldandi við at menna sínar framleiðslur og at finna nýggjar marknaðir, sum kunnu betra um marknaðarstøðuna.

 

Um framtíðarútlitini verður mett, at felagið fer at vaksa um framleiðsluna í 2013 og at minka um framleiðslukostnaðin. Tað skuldi givið eitt enn betri úrslit í 2013 enn í 2012, verður sagt í leiðslufrágreiðingini.

 

Eginpeningur felagsins var við árslok 2012 slakar 100 mió kr.