Partafelagsnevndir hava hug at yvirmeta seg sjálvar

Nevndir í partafeløgum halda seg vera sera virðismiklar, men spurningur verður nú settur, um hetta samsvarar við veruleikan.

Ein sera stórur meirluti av nevndarlimum halda seg skapa tey stóru virðini í fyritøkuni, men stjórarnir eru als ikki sannførdir um hetta. Teir peika á ein sjálvsmynd í erva sum ikki samsvarar við veruleikan.

Í eini kanning hjá stóra ráðgevingarfelagnum PWC,  Annual Corporate Directors Survey, meta 80% av nevndarlimum, at teir eru við til at skapa tey stóru virðini, meðan bert 20% av stjórunum eru samdir við nevndunum í hesum.

Aðrar altjóða kanningar peika sama veg. Eisini stjórarnir halda nógv um seg sjálvar. Tveir triðingar av teimum spurdu halda seg hoyra til tann besta fjórðingin av stjórum.

Kanningin avdúkar, at nevndirnar eiga at seta sær nakrar rannsakandi spurningar. Í fyrsta lagi at tryggja, at fyritøkan fær ta bestu leiðsluna, í øðrum lagi at stuðla henni í at fáa best møgulig úrslit.